Германската сојузна криминалистичка полиција BKA располага со 410 траги што упатуваат на можни терористи меѓу бегалците, а полицијата поради тоа покренала 60 истраги над лица кои бараат азил, пишува весникот Neue Osnabruecker Zeitung.
„Имајќи го предвид продолжувањето на миграцијата во Германија мораме да претпоставиме дека меѓу бегалците се наоѓаат активни и поранешни припадници, приврзаници и симпатизери на терористички организации или исламистички мотивирани воени злосторници“, пренесува весникот, повикувајќи се на извори од BKA.
Германија последниот период се соочува со низа напади кои имаат терористички знаци, но властите и натаму се во дилема за што точно станува збор, наведувајќи дека некои од напаѓачите биле со нарушено психичко здравје. Полицијата наведува дека три од последните четири напади ги извршиле мигранти кои дошле во Германија како баратели на азил.
Нападот во баварскиот град Ансбах во кој беа ранети 12 лица го извел 27-годишен Сириец. Станува збор за бомбаш самоубиец, а баварскиот министер за внатрешни работи Јоаким Херман смета дека тоа е „многу веројатно“ чин на исламистички тероризам.
Вчера попладне 21-годишен сириски барател на азил во Ројтинлег со нож уби трудница, а повреди уште четири други лица.
Во напад со секира и нож 17-годишен Авганистанец минатиот понеделник тешко повреди пет лица, а уште 14 луѓе побараа лекарска помош. Авганистанецот, кој наводно во Германија дошол минатата година, пристигнал како бегалец без придружба од родители, а патниците ги нападнал во близина на Вирцбург, северна Баварија.
Во нападот пред трговскиот центар во Минхен во петокот 18-годишно момче од иранско потекло уби девет луѓе, а рани 16 лица пред да се самоубие.
Од BKA наведуваат дека бројката на луѓе кои ја напуштиле Германија за да ѝ се придружат на Исламската држава пораснал од 800 во мај на 840 во јули. Од една третина кои се вратиле, околу 70 од нив учествувале во активните вооружени дејствија или минале борбена обука, пренесува весникот.