Одлуката на јапонскиот производител на автомобили Hondа да ја затвори својата фабрика во Свиндон е „страшна“ за Велика Британија, рече британскиот министер за стопанство Грег Кларг.
Велика Британија соопшти дека е длабоко разочарана од одлуката на Honda да затвори единствената нејзина фабрика за автомобили во земјата.
„Велика Британија е еден од лидерите во развојот на автомобилските технологии и затоа претставува огромно разочарување што оваа одлука е донесена сега“, рече Кларг.
Тој додаде дека станува збор за комерцијална одлука заснована на досега невидените промени на глобалниот пазар.
Honda соопшти дека ги известила вработените за, како што се вели во соопштението, „предлогот“ за затворање на фабриката во Свиндон.
„Honda во Велика Британија ги информираше вработените за предлогот за затворање на својата фабрика за производство на возила во Свиндон и ставање крај на животниот циклус на производство на актуелниот модел во 2021 година“, стои во соопштението од компанијата.
Јапонскиот производител на возила денеска и официјално соопшти дека ќе ја затвори фабриката во Свиндон, јужна Англија каде се вработени 3.600 луѓе, што се смета за голем удар за британската автомобилска индустрија, особено во очи на излегувањето на Велика Британија од ЕУ на 29 март.
Honda во оваа фабрика лоцирана на 115 километри јужно од Лондон, произведува 150.000 автомобили годишно од популарниот модел Civic.
Компанијата исто така соопшти дека ќе престане да го произведува моделот Civic и во фабриката во Турција од 2021 година, но дека планира да продолжи со работење во таа земја.
