Грчките власти ги повикаа бродарите привремено да го прекинат превозот на мигрантите и бегалците од островите во Егејското Море на копно во рамки на мерките за забавување на мигрантскиот притисок на границата со Македонија.
„Мораме да го забавиме приливот поради тесното грло кое настана на копното“, рече министерот за поморски превоз, Торорис Дрицас.
Грчките власти објавија дека бродовите закупени за превоз на мигрантите ќе мируваат неколку дена. Се намалува и бројот на траекти кои ќе сообраќаат кон островите, каде за превоз чекаат мигрантите кои пристигнаа од Турција, бегајќи од војните на Блискиот Исток.
За да се намали притисокот на островите, мигрантите привремено ќе бидат сместени на самите траекти усидрени во пристаништата во островите Лезбос, Иос и Самос.
Според податоците на грчките власти, 20.000 мигранти се во Грција, а 4.000 чекаат на границата.
Тесното грло настана на границата со Македонија, откако државите од таканаречената балканска рута - Македонија, Србија, Хрватска, Словенија и Австрија, ги заострија мерките за контрола и критериумите за пропуштање на бегалците и мигрантите со што ја разлутија Грција.
