Помина скоро една година од првите протести и впечатливиот говор на младата шведска активистка Грета Тунберг. Таа вчеравечер во Мадрид рече дека нејзиното движење не дава никакви резултати и дека не сака да продолжи понатаму.
„Стануваме сè побројни и се слуша нашиот глас, но политичките партии не преземаат ништо“, изјави 16-годишната Грета пред активистите собрани на вчерашниот митинг во Мадрид. Таа пристигна во главниот град на Шпанија за да присуствува на Самитот за климатските промени на Обединетите нации.
„Не сакаме да продолжиме. Би сакале да ги видиме во акција политичарите кои се на власт“, истакна таа. „Остваривме многу, но ако погледнеме од поинаква гледна точка, не постигнавме ништо“.
Оваа изјава, иако делуваше во знак на признание за поразот, веројатно е обид на Грета да ги посрамоти светските лидери да го постават прашањето за климатските промени како итно прашање за да ја намалат емисијата на јаглерод.
Истото го кажа и во септември во Њујорк, каде што на вториот самит на ООН, рече дека нејзиното место не е тука, а потоа ги посрамоти лидерите дека ги украле нејзините соништа и детството.
Грета, позната по нејзините апокалиптични пораки, изјави дека „немаме иднина“, а нејзините повици за дејствување беа поттик за да се организираат протести низ целиот свет.
Исто така, во ноември, ЕУ прогласи вонредна состојба поради климатските промени во симболичката намера да го стави ова прашање на врвот на агендата на Европската комисија.
Иако Тунберг е активистка за климатските промени, таа не понуди конкретен план за тоа што треба да се прави.
