Најмалку пет лица се повредени во Лондон утрово кога автомобил покоси пешаци на тротоар, во уште еден од низата слични инциденти во светот кои се случија денеска.
Инцидентот се случил на југоистокот од Лондон, на Бромли Роуд во квартот Белингем. Возачот го качил возилото на тротоарот, собирајќи неколку лица, а потоа удрил во ѕидот на една зграда, пишува Mirror.
Пет лица се хоспитализирани. Двајца мажи и една жена се во критична состојба. Засега не се познати причините за оваа несреќа.
Но ова не е прв случај кога автомобили налетуваат на пешаци последниов ден.
Ноќеска вооружен со нож возач на „опел“ нападна луѓе на плоштадот Бузмаркплац во германскиот град Хајделберг. Притоа настрадаа три лица, а еден од нив подоцна почина во болница. Возачот, исто така, е хоспитализиран.
Уште еден сличен инцидент се случи во американскиот град Њу Орлеанс. Таму возило управувано од пијан возач влета во толпа луѓе кои ја следеа парадата Марди Грас. Според последните податоци, повредени се 28 лица, од кои 21 се хоспитализирани, а за 12 луѓе лекарите изјавија дека се во критична состојба.