За најголемите љубители на хорор-филмовите, дистрибутерската куќа МЦФ МКД го претставува најновиот филм на Мајкл Фленаган „Пред да се разбудам“ (Before I Wake).
Ова е приказна за брачниот пар Џеси (Кејт Босворт) и Марк (Томас Џејн) кој се обидува да продолжи со животот, по смртта на нивното дете. Тие решаваат да го посвојат осумгодишното момче Коди, за кого не знаат дека негов најголем страв е да заспие. На почетокот, претпоставуваат дека минатото му го создало стравот од спиење, но наскоро ја откриваат вистинската причина: неговите соништа стануваат реалност, но не на начинот на кој што очекуваат. Соништата на Коди, како сите детски соништа се или неверојатно фантастични или пак ужасни кошмари, а Џеси и Марк се соочуваат со нив.
Во филмот главните улоги ги толкуваат Кејт Босворт, Томас Џејн, Џејкоб Тремлеј, Анабет Гиш и Деш Михок. Мајк Фленаган (Oculus, Hush, Absentia) го напишал сценариото заедно со Џеф Хаурд и ова им е втора соработка - првиот пат соработуваа на психолошкиот хорор филм „Oculus“.
Американскиот хорор-трилер „Пред да се разбудам“ (Before I Wake) може да се погледне во киното Cineplexx од 12 мај.
Погледнете го трејлерот:
