Израелската армија денеска го потврди намерното убиство на тројца синови на лидерот на Хамас, Исмаил Ханије.
Тројца оперативци на военото крило на Хамас се „елиминирани“ во централниот дел на Појасот Газа, соопштија Израелските одбранбени сили (ИДФ).
Војската потврди дека тие се синови на Ханиjе. Сепак, нема потврда за смртта на тројца внуци во инцидентот.
„ИДФ се запознаени со тврдењата дека се повредени и други роднини на Ханије, вклучително и малолетник. ИДФ не ја потврдува оваа информација“, се вели во соопштението.
Претходно, медиумите на Хамас објавија дека тројцата синoви - Хазем, Амир и Мохамед - биле убиени во бомбардирањето на возилото со кое патувале во кампот Ал Шати, а биле убиени и двајца од внуците на Ханије, а третиот бил повреден.
„Нашите барања се јасни и дефинитивни и нема да правиме отстапки. Непријателот е во заблуда ако мисли дека нападите врз моите синови, за време на екот на преговорите и пред движењето да ги испрати своите одговори, ќе го принудат Хамас да ја промени својата позиција“, изјави Ханије за Al Jazeera.
„Крвта на моите синови не ми е подрага од крвта на нашиот народ“, додаде лидерот на Хамас. Ханије е на чело на политбирото на Хамас од 2017 година. Според извештаите на медиумите, тој е исклучително богат и живее луксузен живот во Катар. Ханије има 13 деца.
