Шампионот на Италија, Јувентус, ќе понуди 75 милиони евра за напаѓачот на Наполи, Гонзало Игуаин, пишуваат италијанските медиуми. Аргентинскиот напаѓач беше најдобар стрелец минатата сезона во Серија А, а иако Наполи сега му нуди нов и подобрен договор, неговиот агент најави дека фудбалерот нема да го потпише.
Според информациите, „старата дама“ е подготвена да издвои 75 милиони евра за фудбалерот кој наводно немал ништо против преселбата во Торино.
Во трансферот би можел да биде вклучен и играчот за врска на Јувентус, Роберто Переира, чија вредност се проценува на околу 18 милиони евра.
За напаѓачот е заинтересиран и Арсенал, но Наполи неколку пати нагласи дека нема да го пушти играчот за сума под 94 милиони евра, колку што е неговата откупна клаузула.