Индонезиските власти се во потрага по неколку стотини туристи откако планината Баруџари на островот Ломбок исфрли облак од прав во атмосферата, при што беа евакуирани повеќе од 1.100 луѓе, објави агенцијата за катастрофи на Индонезија.
Вулканот, познат и како детето на Ринџани, затоа што е сместен во пазувите на планината Ринџани, еруптираше без предупредувања вчера попладне, при што беа одложени авионски летови од Ломбок и блискиот остров Бали. Облакот прав достигнал височина од 2.000 метри.
Портпаролот на Агенцијата за катастрофи Сутопо Пурво Нугрото вели дека близу 400 странски и локални туристи се регистрирани дека се качувале на планината од саботата, заминувајќи од Набљудувачницата Сембалун на 11 километри од кратерот.
„Бараме околу 389 други туристи, повеќето странци, за да утврдиме во каква состојба се и итно да ги евакуираме“, вели Нугрото.
Нема извештај за повредени од ерупцијата. Ерупцијата ги оневозможи авионските летови неколку часа на Меѓународниот аеродром на Бали, кој се наоѓа на 135 километри од Ломбок, како и на аеродромот во Матарам, на островот Ломбок.
Правта покри шуми со тенок слој сивило, но градовите и селата не се во опасност.
Ринџани е еден од 130 активни вулкани во Индонезија. Архипелагот е подложен на ерупции од вулкани и земјотреси, поради тоа што се наоѓа на таканаречениот огнен прстен во Пацификот.