Instagram и официјално ја воведе новата функција на мрежата, која ќе овозможи корисниците да објавуваат по повеќе фотографии под еден пост. Тоа значи дека ќе може да се објават фотоалбуми со до 10 фотографии и видеа.
Во текот на следните две недели, новата опција ќе стане достапна за сите корисници, а објавувањето на албуми е речиси исто како и објавувањето на поединечни фотографии или видеа. Новина е select multiple опцијата која овозможува да се одберат повеќе фотки или видеа и заедно да се објават.
Филтрите и прилагодувањата можат да се направат за секоја фотка посебно, но засега во албумите може да се објавуваат само фотографии во квадратен формат.
Корисниците ќе можат да ги гледаат фотките така што ќе лизгаат по екранот од десно кон лево, на истиот начин како што се гледаат фотографиите и на Facebook во чија сопственост е Instagram.
Како и за другите измени што Instagram ги воведе во последниот период, така и за оваа има поделени мислења. Според некои оваа опција може да ја уништи апликацијата бидејќи ќе се преполни со селфи и други фотки што сега се објавуваат како Instagram Stories. Од друга страна, оваа опција им се допаѓа на креативците кои ќе можат да покажат повеќе од своите проекти, а им се допаѓа и на бреновите кои сега ќе добијат поширока платформа за рекламирање.