Иднината на Apple може драстично да се смени по датумот кога ќе биде лансиран iPhone 8, а не е тајна дека нивниот развоен тим е под притисок iPhone 8 да не, океј, да не биде толку тапа како iPhone 7.
Во моментов циркулираат куп гласини за датумот на лансирање, спецификациите, новитетите и дизајнот, па решивме да ги стокмиме најдобрите. Пред да продолжите да читате, битно е да се напомене дека ова се уште само гласини. Иако се популарни гласини кои се поткрепени со нешто повеќе од шпекулации, сепак се само гласини.
Датум на лансирање на iPhone 8
Уште од лансирањето на iPhone 5 (со исклучок на SE), Аpple го објавува секој iPhone во септември и тоа по обичај во првата или втората седмица од септември, па очекувајте работите да останат исти и за iPhone 8.
Се разбира, можно е Apple да не издрибла сите и едноставно да лансира некоја помалку одвратна верзија на iPhone 7 и да го чува iPhone 8 за лансирање во 2018. Но, за среќа, кога ќе се земе во обзир падот на продажбата и лошиот публицитет, ни се чини малку веројатно дека би лансирале повторно уред базиран на iPhone 7.
Дизајн на iPhone 8
Се очекува дека уредот ќе добие сериозна надградба на дизајнот, бидејќи дизајнерите добија многу хејт затоа што го задржаа истиот дизајн во последните три модели.
Засега, шпекулациите укажуваат на масивни промени кои ќе следат во дизајнот на iPhone 8, вклучувајќи и враќање кон целосно стаклено куќиште, како во деновите на iPhone 4. И пред да ги фати паника сите несмасни поради идејата за целосно стаклено куќиште, треба да разберат дека цврстото Gorilla Glass стакло од новата генерација е уште поцврсто, па целосно стаклениот дизајн сега е поизводлив од било кога.
Исто така, на големо се вртат муабети дека дисплејот ќе биде заоблен на рабовите и најверојатно ќе ги интегрира Home копчето, touch ID и предната камера во самиот дисплеј.
Спецификации и карактеристики на iPhone 8
Кога iPhone 7 се појави со стандарден и неверојатно застарен LCD дисплеј, критичарите и корисниците беа шокирани. AMOLED е стандардот во индустријата во ова време, а пркосниот потег на Apple да остане со нивниот застарен дисплеј беше фрустрирачки. Бидет спокојни, луѓето во Apple веќе знаат дека iPhone 8 треба да има компетитивни карактеристики за да го врати легендарниот смартфон во центарот на вниманието.
Доколку шпекулациите се вистина, iPhone 8 ќе има OLED или дури и AMOLED дисплеј.
Една од најголемите гласини е големината на дисплејот на iPhone 8, а се шпекулира дека освен 4,7 и 5,5 инчните дисплеи, iPhone 8 ќе се добие 5,8 инчен дисплеј.
Се очекува iPhone 8 да добие нов А11 процесор кој ќе го направи новиот iPhone повторно најбрз смартфон на светот.
И, конечно се очекува да добие и безжично полнење.
Камерата на iPhone 8
Се очекува задната камера да добие сензор од 14MP, a предната камера да биде интегрирана во самиот дисплеј.