Полицијата во Чикаго го истражува исчезнувањето на ирската пејачка Шинед О’Конор, која за последен пат била видена вчера наутро во предградие на градот.
О’Конор со велосипед го напуштила домот и оттогаш не е видена, пишува BBC. Полицијата од Вилмет соопшти дека има потрага по 49-годишната пејачка, откако таа не се вратила дома по возењето со велосипед.
Полицијата соопшти дека постојат основи за сомневање дека таа е во опасност и дека можеби планира самоубиство. Исчезнувањето го пријавиле некои од нејзините пријатели, односно роднини.
Шинед О’Конор имаше голем успех во 90-тите години со хитот „Nothing Compares 2 U“, песна напишана од Принц. Има снимено 10 соло албуми и доста контроверзни истапи.
Минатата недела нејзиното име повторно беше актуелно бидејќи го обвини комичарот Арсенио Хол дека со дрога го снабдувал Принц, кој почина минатиот месец.
Арсенио тоа го демантираше и најави тужба за ексцентричната ирска пејачка, мајка на четири деца и баба на едно внуче.