Новоизбраниот американски претседател Доналд Трамп ги отстрани изјавите околу плановите за забрана за влез на муслимани во САД од своите официјални веб страници, пишува Independent.
Во изборната ноќ во која стана очигледно дека Трамп ќе биде новиот претседател на САД, страницата на која беа опишани намерите на Трамп да воведе забрана за влез на муслимани во земјата, беше отстранета.
Кликнувањето на оваа страница сега пренасочува на страница на која може да се донираат средства за кампањата на Трамп. Оригиналната страница, пак, беше достапна до утринските часови на 8 ноември, а до промената дојде за време на изборната ноќ.
Изјавите на Трамп за евентуална забрана за влез на сите муслимани во земјата по терористичките напади во Париз кон крајот на минатата година предизвикаа негативни реакции ширум светот. Трамп побара забраната да биде на сила се додека не се открие „што всушност се случува со овие напади“.