Кошаркарите на Торонто Рапторс се пласираа во нивното прво финале во НБА лигата во историјата, откако на шестиот натпревар од финалето на Источната конференција ги победија Милвоки Бакс со 100:94 и стигнаа до конечни 4-2 во серија.
Рапторс по првите два порази во серијата забележаа четири последователни победи и заслужено се изборија за пласман во големото финале.
Иако Бакс водеа со 15 поени разлика во финишот на третата четвртина, Кави Леонард ги презеде работите во свои раце и со неверојатна партија го „изрежира“ големиот пресврт и беше најзаслужен за најголемиот успех на Торонто.
Леонард го заврши натпреварот со 27 поени, 17 скокови и 7 асистенции.
Рапторс во големото финале ќе играат против актуелниот прват Голден Стејт Вориорс и ќе ја имаат предноста на домашниот терен, што значи дека првите два натпревари ќе се играат во Торонто.
