Утрово, во 7.40 часот централниот дел на Италија беше погоден од силен земјотрес со магнитуда од 6,6 степени по Рихтер. Повредени се најмалку 20 луѓе, нема жртви, а материјалната штета е огромна, пренесуваат италијанските медиуми.
Епицентарот на земјотресот бил 68 километри југоисточно од Перуџа, а бил почувствуван и во Словенија, Хрватска и Босна и Херцеговина. Италијанскиот премиер Матео Ренци се обрати на нацијата, со изјава дека и покрај силниот земјотрес нема жртви, додека 20 луѓе се пренесени во болница со полесни повреди. Тој изјави дека ќе бидат обновени сите домови, цркви и градби уништени во низата земјотреси во последните два месеци.
Во последните денови 1.300 луѓе се евакуирани од погодената област од низа земјотреси. Забележана е огромна штета, урнати се катедрали и домови, згради и други објекти. Пред два месеца земјотрес на истото подрачје срамни од земја неколку помали градови, при што загинаа 300 луѓе.