Скопје, 16 октомври 2019 (МИА) – Италијанскиот Сенат денеска го ратификуваше Протоколот за пристапување на Северна Македонија во НАТО.
Протоколот помина во Долниот дом на Парламентот, но ратификацијата во Сенатот се оддолжи поради политичката криза, која се реши со формирањето нова Влада на Италија.
Со Италија, 23 земји досега го ратификуваа Протоколот за пристапување на земјата во НАТО.
Благодарност за ратификацијата изрази министерката за одбрана Радмила Шекеринска на својот facebook профил.
- Благодарам Италија! Уште една ратификација на НАТО Протоколот, напиша Шекеринска во статусот.
Очекувањата се дека Протоколот ќе биде ратификуван и со тоа членството во НАТО ќе се официјализира пред Самитот на Алијансата закажан за 3 и 4 декември во Лондон.
Но, засега неизвесно е дали пред одржувањето на Самитот тоа ќе се случи во шпанскиот Парламент. Двата дома на Парламентот се распуштени. Изборите се закажани за 10 ноември, а доколку сѐ помине како што треба новиот состав на Парламентот би се конституирал на 3 декември.
Шпанскиот амбасадор Емилио Лоренсо Сера во интервју за МИА во однос на ратификацијата на Протоколот пред самитот на Алијансата изјави дека нема конкретен одговор, но, сепак, остава можност тоа да се случи. Според него, извонреден успех за земјата е што само за девет месеци документот го ратификуваа 22 од 29 членки на НАТО. Интервјуто Сера го даде пред ратификацијата на Италија.
Оваа недела за Протоколот треба да се изјасни Националното собрание на Франција, а процесот треба да заврши и во Обединетото Кралство, Холандија и Исланд. Според праксата досега, вообичаено Сенатот на САД последен го ратификува, но поради ситуацијата во Шпанија, сѐ уште не е познато кога ќе биде закажана седницата на Горниот дом на Конгресот.
