Специјалната јавна обвинителка, Катица Јанева, ја напушти седницата на Советот на јавни обвинители на која се разгледуваше Извештајот на СЈО, затоа што не се согласува со начинот на кој постапувал еден од членовите на Советот.
По три часа расправа, таа одлучи да ја напушти седницата поради, како што рече личните навреди од Зоран Сулејманов – член на Советот кој почнал да ја напаѓа обвинителката за работи кои не се однесуваат на Извештајот на СЈО.
Јанева одговори дека нема да трпи лични напади и ја напушти седницата.
„Јас сум задоволна од начинот на кој комунициравме со Советот. Апсолутно сум изненадена од нивната заинтересираност за работата на Специјалното јавно обвинителство и се надевам дека ќе ја продлабочиме самата соработка. Решија дека ќе дојдат да ги посетат просториите на СЈО, каде што согласно нивната надлежност ќе им бидат покажани и самите материјали кои ги имаме кај нас. Во однос на последното, личните навреди и вадење од контекст од Извештајот прашања, немам потреба да ги одговорам и затоа ја напуштив седницата, но сметам дека и членовите на Советот на јавни обвинители, исто така ја напуштија седницата бидејќи не го оправдуваа начинот на кој постапуваше господинот Сулејманов“, рече Јанева, во изјава за новинарите по излегувањето од Советот.
Согласно Законот за СЈО, Јанева е обврзана на секои шест месеци да доставува Извештај за својата работа до Советот на обвинители и Собранието на Република Македонија.