Комисијата за политички систем во собранието почна со разгледувањето на шестмесечниот извештај за работата на Специјалното јавно обвинителство и на годишниот извештај на Јавниот обвинител за 2015 година, кои се на дневен ред на иста седница, но Катица Јанева не доби шанса да одговара на прашања, затоа што не беше утврден редоследот на поставување прашања.
Специјалната обвинителка Јанева од говорницата рече дека по 13 години како обвинител, чест и е што првпат денеска во историјата на Република Македонија, таа претставува обвинителство пред Собранието.
„Не сум видела досега од оваа говорница да се обрати јавен обвинител. Ќе бидам кратка во образложувањето на мојот извештај за да ви оставам повеќе време за ваши прашања“, им рече Јанева на членовите на Комисијата за политички систем, кои бурно реагираа на најавата за кусо образложување на извештајот.
„Не се плашам од тоа да ви дадам одговор на вашите прашања, најмногу поради тоа што ја имам поддршката од поранешниот премиер Никола Груевски“, додаде Јанева.
Специјалната јавна обвинителка Јанева, пред собраниската Комисија за политички систем соопшти три барања кои според неа ќе ја олеснат работата на Обвинителството.
Јанева побара измена на Законот за Специјалното јавно обвинителство односно на член 22 и да се пролонгира рокот од 18 месеци за да може до крај да се истражи кој незаконски прислушувал. Јанева повторно го повика собранието да ги донесе измените на Законот за заштита на сведоците за да може да ги истражи случаите, почнатите истраги и предистраги и дејствијата поврзани со нелегалното прислушување, за да се дојде, како што рече, до вистината кој прислушувал, во кој период и за какви цели.
Координаторот на пратеничката група на ВМРОДПМНЕ, Илија Димовски, во реплика постави низа прашања до Јанева, но таа не одговори на ниту едно бидејќи пратениците не беа договорени за редоследот на обраќања. Кога Јанева доби можност за одговор рече дека ќе се произнесе на крајот од седницата.
Координаторите на парламентарните групи, во меѓувреме, до претседателот на Комисијата Влатко Ѓорчев доставија предлог за редослед на обраќања на пратениците. Седницата е прекината на барање на Рафиз Алити од ДУИ.
На седницата присутен беше и државниот јавен обвинител Марко Зврлевски, кој пак ќе го презентира Годишниот извештај за работата на Јавните обвинителства во Република Македонија за 2015 година.
Собраниската седница, пак, на која ќе бидат разгледувани извештаите на обвинителствата, претседателот на Собранието ја закажа за понеделник, 26 септември.
