Тим на Специјалното јавно обвинителство, предводен од обвинителката Катица Јанева, имаше работна средба во Советот на јавните обвинители.
Јанева, по завршувањето на средбата, рече дека се зборувало за тековни работи и проблеми со кои се соочува СЈО, но без да изнесе детали за тоа дали на барање на Советот ќе му го дадат предметот „Пуч“ од чие обвинение СЈО се откажа.
„Беше работна средба, ќе има уште вакви средби. Сè уште ништо не е конечно ќе разговараме и понатаму дали ќе им го предадеме предметот „Пуч“, рече Јанева по средбата.
Таа не ја коментираше претставката од МВР по која Советот побара СЈО да појасни зошто се откажало од понатамошно кривично гонење на пет лица меѓу кои и лидерот на СДСМ, Зоран Заев.
Во заедничкото соопштение од СЈО и Советот за јавни обвинители се вели дека на средбата станало збор по писменото барање на Советот за предавање на увид на списите по предметот „Пуч”.
СЈО во јануари соопшти дека се откажува од обвинението за „Пуч“ кое го наследни од Обвинителството за организиран криминал и корупција бидејќи доказите со кои располагаат се во спротивност со доказите до кои тие дошле во истражните постапки „Таргет“ и „Тврдина“.
Во „Пуч“, покрај лидерот на СДСМ Зоран Заев, обвинети беа и поранешниот разузнавач Зоран Верушевски, неговата сопруга Соња, општинскиот службеник од Струмица, Бранко Палифров и Ѓорги Лазаревски, вработен во МВР. Тие беа осомничени за шпионажа и за насилство спрема претставници на највисоките државни органи.