Никола Јокиќ брилираше ноќеска против Лејкерс и го предводеше својот Денвер Нагетс до предност во првото коло од плеј-офот, но привлече големо внимание уште пред самиот натпревар.
Имено, тој на натпреварот дојде облечен како Гру, популарниот лик од анимираниот филм „Despicable Me“.
Јокиќ е промотор на четвртиот дел од легендарниот филм, а ги воодушеви сите фанови на Минионите кога се појави во истата облека и со голема пругаста марама околу вратот, како Гру.
Веднаш откако Јокиќ влезе во салата облечен како Гру, се појави тизерот од филмот „Despicable Me 4“ во кој тој разговара со психотерапевт за проблемите со кои се соочува.
Имено, Минионите се убедени дека тој е нивниот шеф Гру, а тој залудно се обидува да ги разубеди.
Инаку, во првиот натпревар од четвртфиналето на Западот, кошаркарите на Денвер го победија Лос Анџелес Лејкерс со 114:103, а Јокиќ постигна дабл-дабл со 32 поена, 12 скока и 7 асистенции.
Му помогнаа соиграчите Џамал Мареј со 22 поена, Мајкл Портер додаде 19, а Арон Гордон и Кентавиус Калдвел-Поуп по 12 поени.
Кај поразениот тим Ентони Дејвис постигна 32 поена, а Леброн Џејмс 27. Потфрли Д'Анџело Расел кој шутираше 6/20 од поле и 1/9 за три поени.
Во другиот натпревар одигран во култниот „Медисон Сквер Гарден“ Њујорк Никс славеа во дуелот со Филаделфија 76ерс со 111:104. Џејлен Бренсон го предводеше својот тим до победата со 22 поена.
Исто толку поени, заедно со неколку клучни тројки во последниот дел, постигна и Џош Харт, но овојпат славата отиде кај резервистот Дис МекБрајд. Ова момче го заврши натпреварот со 21 поен, а реализираше 4 тројки.
Филаделфија ја предводеше Жоел Ембид со 29 поени.
