Јулија Скрипал, ќерката на поранешниот руски шпион Сергеј Скрипал, вели дека нејзиниот свет потполно се превртел наопаку, но дека е среќна што е жива и без оглед на сите околности таа планира да се врати во Русија.
Сергеј Скрипал и неговата ќерка беа пронајдени онесвестени на 4 март на клуба во јужниот англиски град Салисбури. Јулија беше 20 дена во кома.
„Се разбудив по 20 дена поминати во кома и дознав дека јас и мојот татко сме биле отруени. Фактот дека е употребен нервен агенс е шокантен и тешко беше да се прифати тоа“, вели Јулија.
Пред 20 дена Јулија Скрипал беше пуштена од болница, откако беше потврдено дека таа нервниот агенс веќе не делува опасно на нејзиното здравје. Изјавата за Reuters таа ја даде од тајна локација во Англија.
„Благодарни сме на понудата на руската амбасада и нивното гостопримство, но во моментов јас и мојот татко не сме подготвени да ја прифатиме нивната помош“, додаде таа.
Таа не сакаше да зборува премногу за деталите околу лечењето, престојот во болницата и опоравувањето, но призна дека нејзиното опоравување, како и на нејзиниот татко, биле исклучително болни и тешки. Таа вели дека лечењето било депресивно, поради тоа што тие двајца воопшто немале приватност и знаеле дека во секој момент може да се случи нешто лошо.
Велика Британија и раководството на ЕУ ја обвинија Русија за труење и обид за убиство на Сергеј и Јулија Скрипал. Британските државници тврдат дека нападот е извршен со нервен гас кој е познат под името „новичок“. Наводно, тој се произведувал во поранешниот Советски Сојуз, но од Москва тврдат дека таков гас ниту се произведува, ниту пак некогаш се произведувал на нивната територија.
