Берлин, 3 јуни 2019 (МИА) – Претседателот на Европската комисија, Жан-Клод Јункер, кому му истекува петгодишниот мандат, се пожали на тоа како живее во изминатите пет години, истакнувајќи дека „претседателот на ЕК нема ниту резиденција ниту приватен авион”.
– Живеам во хотелски апартмен од 50 квадратни метри за 3.250 евра месечно, а ни Доналд Туск нема резиденција, изјави Јункер за германскиот Bild.
Тој додава дека генералниот секретар на НАТО живее во куќа, а речиси сите амбасадори имаат свои резиденции.
За Јункер најголемиот проблем, е, како што вели – што тука никого не може да повика.
– Не можам да поканам официјални лица на гости да седат на мојот кревет. Кога патував со комерцијални летови во посета, секогаш ме повикуваа во своите резиденции, вели Јункер.
Во интервјуто за Bild, претседателот на ЕК потврди дека Европската комисија нема свој авион.
