Демијан Ескере, истражувач од Австралискиот национален универзитет, тврди дека дошол до историско откритие кое го поништува „златното правило“ на еволуцијата, според кое животинските врсти не можат да ги повратат карактеристиките кои ги изгубиле во тек на еволуцијата.
Австралиската државна телевизија ABC на сопствениот сајт ја објави приказната за истражувањето на Ескере и контроверзното сознание кое се однесува на животот на неколку посебни видови на јужноамерикански гуштер.
Во истражувањето се наведува дека гуштерите кои порано се размножувале со положување јајца, кога се преселиле во новото живеалиште на Андите се претвориле во видови кои раѓаат живи потомци за да се прилагодат на новото опкружување.
Ескере тврди дека неколку од овие видови повторно се вратиле на положување јајца, кога научниците ги спуштиле од планинските врвови во потоплите краишта.
„Инкубацијата на јајца не е доволно добра на ниски температури, а секако дека на врвовите на Андите е прилично ладно. Положувањето на јајца во таквото опкружување не било идеална опција, па тие се приспособиле да раѓаат живи потомци. По истражувањето, имаме силни докази дека тие рееволуираа и повторно се приспособија да несат јајца откако се преселија на потопло живеалиште“, вели Ексере.
Тој додава дека ниту еден животински вид досега не успеал да рееволуира, односно да ги поврати карактеристиките кои ги изгубил во тек на еволуцијата.
Истражувањето на Ескере беше објавено во научниот магазин Evolution, и во него се наведува дека „преминувањето од несење јајца на раѓање живи младенчиња и повторно на несење јајца е исклучително ретка појава во еволутивниот процес“. Според Доловиот закон за неповратност, односно „златното правило“ на еволуцијата, еден жив примерок не може да ги поврати карактеристиките кои ги изгубил како резултат на еволуцијата. Овие гуштери го докажуваат спротивното.