Холивудската актерка и оскаровка Сузан Сарандон реши јавно да проговори за една многу нефер состојба во филмската индустрија во САД за која сите знаат, но ретко кој зборува јавно.
Сарандон, која на Филмскиот фестивал во Торонто го претставува нејзиниот најнов филм, го критикуваше доделувањето на престижните награди на Американската академија за филмска уметност и наука, кое денес, повеќе од кога било се купува со интензивно лобирање и огромно вложување пари.
„Пет пати сум била номинирана и еднаш освоив Оскар, но тогаш за тоа не требаше да се трошат пари“, рече актерката која освои Оскар за улогата на Хелен во филмот „Dead Man Walking“ од 1995 година.
„Такво нешто денес веќе не би било возможно“, додаде таа и ги осуди скапите кампањи за лобирање што се водат и по шест месеци пред гласањето, преку свечени приеми, ВИП проекции на филмовите и други скапи настани за „умилкување“ на членовите на Академијата.
Сарандон ја даде смелата изјава на вториот ден од фестивалот во Торонто, најголемиот филмски фестивал во Северна Америка што ќе заврши на 15 септември.
Филмот „Blackbird“ во кој игра мајка која е смртно болна и бара евтаназија, ќе биде претпремиерно прикажан на фестивалот.
