Британскиот премиер Дејвид Камерон во своето прво обраќање по референдумот во кој граѓаните гласаа за напуштање на Европската унија, изјави дека волјата на народот мора да се почитува, па затоа на Британија и треба нова влада во рок од три месеци.
Според Камерон ова е еден од најзначајните моменти во Британската историја, како и дека не жали за ништо иако сепак смета дека останувањето во ЕУ бил подобриот избор.
„Желбата на граѓаните мора да се почитува. Сакам да им се заблагодарам на сите кои учествуваа во кампањата за останување во ЕУ, но исто така и да им честитам на оние кои мислеа поинаку и кои сметаа дека така Британија ќе биде посилна“ - изјави Камерон.
Тој најави дека ќе се обиде да ја стабилизира државата во следните недели, но и дека треба нова влада која треба да ја води државата кон следната дестинација.
Камерон изјави и дека оваа одлука не ја донел лесно, но дека таа е во најдобар интерес на Британија. Тој изјави и дека на почетокот граѓаните нема да почувствуваат никакви промени, особено во поглед на движењето на британските граѓани и во транспортот на стоки.