Спортскиот директор на Интер, Бепе Марота, уште еднаш покажа дека е мајстор на својот занает.
Откако, го убеди Пјотр Желињски како слободен играч да потпише за Интер и да стане член на „Нераѕурите“ од следното лето, клубот од „Џузепе Меаца“ ангажираше уште еден играч.
За неколку дена нов играч на Интер ќе стане Канаѓанецот од белгиски Клуб Бриж, Тејџон Бјукенен. Интер за неговиот трансфер ќе издвои 10 милиони евра.
Овој 24-годишен фудбалер игра како лево крило во белгискиот клуб, а може и да ја покрива целата лева страна, како латерален бек во формацијата што ја форсира тренерот Симоне Инѕаги.
Сезонава на 20 натпревари за Бриж постигна 3 гола и забележа 4 асистенции.
Бјукенен како дете кариерата ја почна во Бремптон од истоимениот роден град во Онтарио, а преку Мисисага Фалконс и Риал Колорадо дојде во НЦАА колеџ тимот на Сиракјуз Оринџ. Потоа преку Сигма и Њујорк Револушн во 2021 година дојде во Бриж.
Репрезентативец на Канада е од 2021 и досега има собрано 35 настапи и 4 гола, а беше дел и од Мундијалот 2022.