Хали Бери вели дека би сакала да режира римејк на филмот „Catwoman“ и откри што би променила во неуспешниот филм од 2004 година.
„Би сакала да режирам римејк на филмот Catwoman“, изјави актерката во текот на промовирањето на филмот Bruised кој е нејзино режисерско деби.
„Bruised беше напишан за бела ирска католичка девојка на возраст од 25 години и морав да променам некои работи. Би сакала да можам да се вратам и исто така да променам некои работи во филмот Catwoman. Да го искористам тоа што сега го знам за режијата“, вели искрено Бери.
Филмот Catwoman беше и критички и комерцијален неуспех. Заработи 82 милиони долари, а направен е со буџет од 100 милиони долари. Беше номиниран за дури 7 Златни малини, а освои награди за најлош филм, најлоша актерка, најлош режисер и најлошо сценарио.
Многу критичари овој филм го сметаат за еден од најлошите во историјата.
Бери објасни како би го подобрила римејкот.
„Би сакала Catwoman да го спаси целиот свет, како што прават и сите суперхерои, а не само да спасува жени од сушење на кожата. Би вложила многу повеќе и тоа би се однесувало и на мажите и на жените“, вели таа.