Македонија

Кинескиот удел во македонската 5G мрежа е проблематичен за НАТО, Владата ќе реагира

3. декември 2019 - 19:36 | МИА

Лондон, 3 декември 2019 (МИА) – Иако не е услов за членството на Северна Македонија во НАТО, се отвораат прашања околу безбедноста и кинеското влијание во развојот на 5G мрежата и дигиталната инфраструктура во земјата, потврдија денеска од Владата.

На Самитот на лидерите на НАТО кој ќе се одржи утре во Лондон, 5G технологијата, улогата на Кина и на нејзиниот оператор Huawei ќе бидат отворени, како што најави генералниот секретар на Алијансата, Јенс Столтенберг.

Мнозински сопственик на Македонски Телеком е унгарската MATÁV, дел од Deutsche Telekom, кој соработува со Huawei во развојот на новата технологија. Оттука Владата, иако е делумно сопственик на македонските телекомуникации има ограничено влијание врз одлуките поврзани за 5G, велат од Владата.

Меѓутоа, со оглед на жестоките расправии во ЕУ и во НАТО за ризиците што ги носи кинеското влијание преку Huawei, но и со оглед на загриженоста во нашата влада, велат дека прашањето се разгледува од блиску и оти ќе има реакција.

- Ние не сме доминантен сопственик, но сепак имаме удел во нашиот Телеком и сме регулатор, ќе се трудиме во стратегиите што ги носи Владата за 5G како услови да бидат вградени овие  безбедносни услови за НАТО, наведoa високи владини извори денеска во Лондон на брифинг со новинарите.

Прашањето за тоа до кој степен треба да се отворат пазарите за кинескиот гигант се една од најбурните теми помеѓу сојузниците во НАТО и прашањето кое ќе биде на маса и утре, за Северна Македонија, како што велат од Владата, „прашањето не може да се одмолчи“ и покрај тоа што станува збор за приватна фирма.

- И за приватни фирми постојат правила, но прерано е сега пред да имаме горе-долу усогласен став во рамките на Алијансата, да не бидеме поголеми католици од Папата, објаснуваат од Владата. Сепак, додаваат, „факт е дека кога мрежата беше државна и кинеските фирми немаа земено толкав залет, мрежата беше комплетно на европска платформа и беше многу квалитетна, Huawei во последните пет-шест години влезе во Deutsche Telekom“.

Од Владата истакнуваат и дека проблемот со безбедноста на мрежата е прашање кое се поставува и вон рамките на НАТО, бидејќи во фокусот се личните податоци на македонските граѓани кои треба да бидат заштитени. Прашањето веќе е отворено и во разговорите со Град Скопје во рамки на развојот на концептот „Паметен град“.

– Овие елементи ќе влијаат и кога ќе ги правиме системите на Smart City сме го разговарале со Град Скопје, во системите на набљудување да не им ги даваме на тацна информациите за нашите граѓани, велат од Владата.

Темата е отворена на највисоко ниво во Владата и како што ветуваат оттаму, нема да остане без реакција.

– Рано е да кажуваме, но како регулатор ќе се вмешаме, тврди висок владин извор.

Коментирај