Маж и жена денеска останаа залепени на црвениот тепих на отворањето на Берлинскиот филмски фестивал, повикувајќи ја германската влада и општеството да преземат поголема акција во борбата против климатските промени.
Двајцата активисти се залепија на тепихот откако филмските ѕвезди пристигнаа во Берлинале Паласт на церемонијата на отворањето на фестивалот, каде што украинскиот претседател Володимир Зеленски ѝ се обрати на публиката преку видеоврска и каде можеа да ја погледнат премиерата на филмот She Came To Me на американската режисерка Ребека Милер.
Групата активисти „Последна генерација“, која го организираше протестот, рече дека актуелната влада и општеството се последните кои имаат шанса да го спречат климатскиот пекол со милијарди мртви.
„Залагањето за одржливост во мал обем, како што тоа го прави Берлинале, е важно, но тоа нема да нè спаси само по себе. Мораме да ги свртиме работите“, рече Рафаел Воелми, еден од активистите.
„Ако продолжиме да бегаме од реалноста, ќе ги поминеме првите климатски пресвртни точки и ќе започнеме смртоносна лавина од која нема спас“, рече Лиза Винкелман, друга активистка.
Имаше извици, но протестот не предизвика поголеми нарушувања. Групата рече дека двајца нивни активисти ја прескокнале оградата за да протестираат. Црвениот тепих беше горе-долу празен кога започна протестот бидејќи повеќето гости веќе влегоа во зградата.
