Климатски активисти од движењето Last Generatiot ги блокираа мостовите на реката Елба во северниот германски пристанишен град Хамбург, што доведе до насилни интеракции со гневните возачи.
Според полицијата, четири лица утрото се залепиле за тротоарот со брзостврднувачки бетон и го блокирале сообраќајот до завршувањето на протестот во попладневните часови.
Бидејќи другите пристапни патишта до градот се затворени поради градежни работи, мостовите Елба се единствениот начин да се стигне до Хамбург од југ.
На социјалните мрежи се појави видео на кое се гледа како возач на камион ги губи нервите, го влече демонстрантот од патот и го клоца во стомакот.
„Овој инцидент се случи пред да влезе полицијата“, изјави портпаролот на полицијата, додавајќи дека истрагата е во тек.
Фотограф на dpa, исто така, објави дека агресивните возачи одговориле на блокадата со клоци и тупаници на активистите.
Во Берлин, демонстрантите се собраа пред Бранденбуршката порта на протести и концерт за поддршка на референдумот за забрзување на мерките против климатските промени во главниот град.
Според полицијата, на митингот Klimaneustart (климатско ресетирање) се очекуваат околу 35.000 луѓе.
За време на петчасовниот настан, предвидено е неколку бендови да свират заедно со говорите на познатите активисти како Луиза Нојбауер и експертот за одржливост Маја Гепел.
На референдумот денеска граѓаните на Берлин можат да изберат дали сакаат градот да стане климатски неутрален до 2030 година, наместо до 2045 година како што беше претходно планирано.
На национално ниво, германската влада сака да постигне климатска неутралност до 2045 година.