Групата за климатски активисти „Последната генерација“ повторно протестираше во саботата блокирајќи ги патиштата на неколку места во Германија, но овој пат демонстрантите не се залепија на асфалтот.
Околу 130 лица напладне го блокираа берлинскиот мост Варшауер, соопшти полицијата. Неколку пати седнуваа и стануваа од асфалтот.
Во Минхен и Регенсбург, полицијата брои 120, односно 150 демонстранти на регистрирани и нерегистрирани собири. Во Минхен немаше поголеми проблеми во сообраќајот.
Недалеку од терминалот за LNG на балтичкиот остров Риген, 30 активисти го прекинаа сообраќајот на пристапниот пат до пристаништето за траект Сасниц.
Полицијата првично го дозволи протестот, но по неколку часа го прекина.
Портпаролот на демонстрантите рече дека имаат намера да останат подолго, веројатно до недела, истакнувајќи дека го сметаат терминалот за „врв на лудилото за фосилните горива“.
Протести имаше и на југозападот на земјата, во Фрајбург и Карлсруе и на аеродромот во Штутгарт. Протестите беа мирни.
Во Бремен, на северозападот на земјата, околу 100 климатски активисти окупираа раскрсница во центарот на градот.
Нови блокади се планирани и во Келн на запад и во Лајпциг на исток од земјата.
„Последната генерација“ повикува на радикална акција против климатските промени, вклучително и целосно отфрлање на фосилните горива.
Тие организираат блокади од почетокот на 2022 година.
Демонстрантите често знаеја и да се залепат за асфалтот, но неодамна порачаа дека повеќе нема да го прават тоа.
