Сабота, 6 мај, од 11 часот во Промотивниот центар во рамки на Саемот на книгата 2023, во спортскиот центар „Борис Трајковски“, Скопје ќе се одржи Читачка промоција на книгата за деца „Ведра“ од Јулијана Величковска и работилница за цртање со илустраторот Марио Каев.
За „Ведра“ рекоа:
Ѓоко Здравески: „Ведра“ е приказна што си игра со архетипите, влегува длабоко и таму буричка, менува, поправа, разместува, отклучува. Го има оддалечувањето од домот, ги има опозициите добро – зло, светло – темно, блиску – далеку, но има и изненадувања, што самите ќе ги откриете кога ќе ја прочитате.
„Ведра“ ги има главните карактеристики на литературата за деца: директно му се обраќа на детето, ненаметливо го подучува, нежно влегува во неговиот несвесен свет и таму менува колективни знаења што не се нужно точни; покрај тоа, духовита е, и приказната и илустрациите. Децата ќе ја обожаваат. И, како и секоја добра приказна за деца, ова не е само приказна за деца, туку е приказна за секого.
Ана Голејшка Џикова: „Ведра“ е како микро и макропатување низ сите сплетени приказни од народното творештво со најбрз кабриолет и со најфраерски очила за сонце! Ова е сликовница омаж на пријателството, слатководна, брзоречита, лесночитлива во изразот. Играта со римата и песнопојот во текстот, предизвикува чувство како да сте во постојан ритам на приказната, како да пеете. Мајсторски се вметнати елементи од современите и вечни стравови на децата (инјекции, манџи, ако плачеш – ќе ти дојде змејот!) и на родителите (дете што постојано плаче или постојано e на таблет). Сладокусна, вкусна, игрива и поучна приказна за деца, но и за возрасни. Илустрациите го доловуваат ефектот на спектакл преку интензивните, конкретни бои (...) оваа сликовница работи со архетипски слики, пренесувајќи ја најубавата порака – кога ти е тешко, исплачи се. Ќе ти се разведри и ќе ти стане полесно. Само читај и верувај во добрината.
Иван Шопов: Волшебна приказна за една волшебна плачка ‒ малата принцеза Ведра. Бајка што ќе им помогне на малите плачковци да победуваат змејови, а на возрасните да не ги осудуваат кога плачат. Забавна, имагинативна и фантастично илустрирана книга, што ни ја открива скриената моќ на солзите.
Весна Мојсова-Чепишевска: „Ведра“ бранува со отворено прашање за нејзиното припадништво. Ако ги прашате децата, тие додека ја слушаат или потоа додека ја читаат (тогаш кога ќе можат да ја читаат), без многу размислувања ќе ви кажат дека оваа приказна е иста како оние приказни на браќата Грим, а ние проучувачите на книжевноста за деца би се согласиле и би дополниле: и како оние Вуковите т.н. „женски приказни“, и како оние волшебни приказни на Цепенков (особено оние во кои се појавуваат разни змејови, сеништа и караконџули).
„Ведра“ е сказна настаната и под влијание на народното творештво, но и од познавањето на митологијата и тоа онака како што тоа вешто го правеа Александар Сергеевич Пушкин или Ивана Брлиќ-Мажураниќ.
