Филм & ТВ

Кој друг, ако не Netflix: Нарачана спиноф серија на „Vikings“

20. ноември 2019 - 18:03 | А.С.

Ако некој знае да препознае хит или максимално да го искористи моментот, тоа е Netflix.

Тоа го докажа и со најновиот бизнис потег – нарача спиноф серија на популарната „Vikings“, во која дејството се случува 100 години по она во оригиналната серија.

Стриминг платформата ја нарача спиноф серијата на популарната драма на History channel од оригиналниот креатор Мајкл Хирст.

Според Netflix, новата серија – „Vikings: Valhalla“ – „ги заокружува и драматизира авантурите на најпознатите Викинзи кои некогаш живееле – Лејф Ериксон, Фрејдис, Харалд Харада и кралот Вилијам Освојувачот кој има викиншко потекло. Овие храбри мажи и жени пробиваат нови патеки во нивните борби за опстанок во Европа која постојано се менува и евокуира. Ова е експлозивното ново поглавје во легендата за Викинзите.“

Хирст го планира Џеб Стјуарт (Die Hard, The Fugitive) за креативен директор на новата драма:

„Превозбуден сум што го најавуваме продолжението на нашата сага за Викинзите. Знам дека милиони фанови ширум светот ќе бидат пресреќни. Џеб Стјуарт е одличен писател, ќе донесе нови приказни и моќна визија за некои од најпознатите Викинзи во историјата.“

History се подготвува за емитување на шестата и последна сезона на серијата „Vikings“, почнувајќи од 4 декември.

Вистинска реткост е сосема друга компанија да ги добие правата за спиноф серија додека оригиналната уште активно се емитува, но од друга страна, тоа не е изненадување кога знаеме дека Netflix е вмешан во приказната.

„Vikings: Valhalla ветува дека ќе понуди сѐ што обожавателите сакаа кај оригиналната серија: енергична, возбудлива, моќна акција втемелена во длабоки ликови и драматична приказна што се врти околу семејството, лојалноста и моќта“, вели потпретседателот на одделот за оригинални серии на Netflix.

Поголемиот дел од членовите на оригиналниот тим на „Vikings“ се согласни да работат на новата серија, а продуцентите планираат повторно да снимаат во Ирска.

Коментирај