По неколку месеци исполнети со шпекулации, нагаѓања и мистериозни извештаи, конечно „протекоа“ првите детали за дизајнот на новиот телефон на Apple за оваа година, што ќе се појави на пазарот под името iPhone XI.
Дизајнот беше „откриен“ преку рендер видео кое го прикажува уредот од сите агли. Од друг извор дознаваме дека iPhone XI Max ќе биде нешто поголемата верзија на основниот уред iPhone XI.
Систем од три камери на задниот дел
Уште откако во 2016 година на пазарот се појави моделот iPhone 7 Plus, најскапите телефони на Apple доаѓаа со две задни камери. Ама трендовите ја притиснаа компанијата да направи измени и да вгради дополнителна камера, како останатите уреди на пазарот. Ова ќе биде првпат за Apple да имплементира систем од три камери на задниот дел, кој засега е сигурно дека ќе биде присутен кај моделот iPhone XI Max.
Една од камерите се очекува да биде со суперширок агол, а сите три камери ќе бидат сместени во внатрешноста на квадратниот модул, кој може да се види на задната страна на моделот. Засега нема нови информации, но се претпоставува дека сензорите на камерата ќе бидат со добро познатата резолуција од 12 мегапиксели.
Покрај овој сензор, очекувано е системот од три камери да има примарен, но и телефото сензор, кој исто така би имал резолуција од 12 мегапиксели. Во зависност од бојата, ќе се менува и бојата на стаклото на екранот, но сензорите околу себе секогаш ќе го имаат истото стакло во црна боја.
Нема промени на предниот дел, но селфи камерата е унапредена
Според очекувањата, телефонот би требало да го задржи истиот дизајн на предната страна, што ќе претставува трета генерација која доаѓа со истиот изглед, по iPhone X и iPhone XS. Новиот модел би требало да го има добро познатиот 6,5-инчен OLED екран, со голем „notch“ на горниот дел. Некои извештаи велат дека „notch“-от ќе биде минимално намален, но тоа не е прикажано на рендерите.
Покрај тоа, Apple подготвува напредна и усовршена верзија на Face ID технологијата за препознавање на лица, со која корисниците ќе можат да го отклучат телефонот со самото тоа што го држат во близина на себе. По четири години во кои уредите на Apple пристигнуваа со селфи камера од 7 мегапиксели, новиот iPhone XI би требало да има подобрена селфи камера од 12 мегапиксели.
Има ли уште нешто ново?
Иако нема официјална потврда, сепак е познато дека новиот iPhone XI ќе користи процесор од моделот A13, а со него ќе пристигне и новиот оперативен систем iOS 13. Некои гласини велат дека овој модел би можел да поддржува reverse wireless charging, со кој корисниците ќе можат да ги полнат нивните Air Pods и Apple Watch преку тоа што ќе ги допрат до телефонот.
Според најавите, iPhone XI Max би требало да дебитира на традиционалната Apple конференција заедно со основниот модел XI и нешто поевтиниот iPhone XR смартфон.