Монако го суспендираше Тиери Анри од тренерската позиција на клубот и вечерва беше објавено дека суспензијата ќе остане на сила додека не се донесе одлука за неговата иднина.
Од утре, тренинзите на „црвено-белите“ ќе ги води помошникот на Анри – Франк Паси.
Анри го презеде Монако пред три месеци откако го смени Португалецот Леонардо Жардим, кој со клубот успеа да ја освои лигата само две години претходно. Французинот го предводеше Монако во 20 натпревари, во кои забележа 4 победи, 5 нерешени и загуби дури 11 пати.
Во Лига 1 под водство на Анри, Монако има 12 натпревари во кои тимот има само 2 победи и ниту еден триумф како домаќин. Притоа, тој испадна од групната фаза во Лигата на шампионите и неделава беше елиминиран од домашниот Куп по поразот од второлигашот Мец.
Сепак, проблемите во клубот не се само резултатски. Тиери Анри „избрка“ неколку од играчите од првиот тим и ги примора да тренираат со резервите бидејќи не се сложуваше со нивниот пристап кон фудбалот. Тој сметаше дека тие „мислат само на себе“, а не на клубот.
Додека да дојде до разрешница за иднината на француската легенда, неговиот помошник Франк Паси ќе седне на тренерското место. Но, веќе е изгледно кое ќе биде решението на раководството – отказ за Анри.