Кога некој би ви кажал дека планира да изгради аеродромска писта која ќе биде во форма на кружница и накосена како велодром, веројатно би помислиле дека се работи за луда идеја на некој стартап. Но, кога ќе прочитате дека ваква писта е проект наречен Endless Runway кој го финансира Европската комисија, ќе си кажете „тука има нешто”.
Според мислењето на холандскиот NLR (National Aerospace Laboratory), токму ваквиот дизајн е иднината на аеродромите која ќе ја зголеми ефикасноста и безбедноста на воздушниот сообраќај, а истовремено ќе има попозитивно влијание врз околината, ќе штеди гориво и ќе ја намали бучавата.
Идејата на NLR не е баш нова - ваква писта тестирала американската војска уште во 1960-тите години, иако никој до денес не изградил комерцијален аеродром по овој принцип.
Идејата е на кружна писта со должина од 3,5 километри со накосена „банкина” да им се овозможи на авионите успешно да слетуваат и да полетуваат од било кое место во било која насока, а накосеноста на аеродромот во целост го елиминира влијанието на ветерот кој претставува голем проблем на стандардните писти. Веќе се вршат тестирања во симулатор, а пистата на тестирањата се покажува како целосно ефикасен систем, што можете да видите во видеото подоле:
Иако должината на пистата ќе изнесува како три прави писти, NLR вели дека ваквата писта ќе има оперативност како четири такви, а ќе има можност три авиони истовремено да слетуваат и полетуваат во секој момент.