Напаѓачот на Арсенал, Александр Лаказет, доби повик од француската репрезентација за претстојните натпревари против Холандија и Уругвај, но само два часа откако беше известен дека треба да се појави на репрезентативниот тренинг, тој реши да го одбие селекторот Дидие Дешамп.
Поради повредата на Ентони Марсијал, напаѓачот на Арсенал доби шанса да се приклучи на репрезентативниот состав на Франција, но тој експресно ја одби поканата.
Александр Лаказет не беше дел од оригиналниот состав кој селекторот Дешамп го достави до федерацијата минатиот четврток. Но, повредите на Пол Погба и Ентони Марсијал ослободија две места во составот, па тој реши денеска да ги пополни со Лаказет и Муса Сисоко.
Само два часа откако ги именуваше замените, Дешамп доби одговор дека Лаказет нема да се појави на репрезентативниот собир. Оваа одлука, како што тврдат од Арсенал, била донесена во согласност со клупскиот доктор кој го советувал Французинот дека е најдобро да остане во клубот за време на репрезентативната пауза.
Бидејќи француската репрезентација располага со огромен квалитет и тоа во огромен квантитет, Дешамп веднаш ја пронајде замената за Лаказет. Тоа е 25-годишниот Алесан Плеа, кој игра за Борусија Менхенгладбах и годинава постигна 8 голови во 11 натпревари за клубот.
„Тој има добра сезона и постигнува голови, но конкуренцијата за неговата позиција е преголема и во моментов решавам да останам со играчите кои ги избрав за Светското првенство“, рече Дешамп во октомври, кога не го повика Лаказет во репрезентацијата.
Оливие Жиру, Антоан Гризман и Килијан Мбапе се најдоа помеѓу избраните напаѓачи за натпреварите на Франција против Холандија и Уругвај. Надвор од составот е и Бенџамин Менди, кој се откажа од настапи за репрезентацијата до крајот на оваа календарска година.