Рускиот министер за надворешни работи Сергеј Лавров вчера изјави дека се надева оти американскиот претседател Џо Бајден има мудрост да се справи со глобален конфликт сличен на Кубанската ракетна криза во 1962 година.
Во интервју за документарен филм на руската државна телевизија за ракетната криза, Лавров рече дека има сличности со 1962 година, главно затоа што Русија сега е загрозена од западно оружје во Украина, објави Reuters.
„Се надевам дека во денешната ситуација, претседателот Џо Бајден ќе има повеќе можности да разбере кој и како ги издава наредбите. Оваа ситуација е многу вознемирувачка. Разликата е во тоа што во далечната 1962 година Хрушчов и Кенеди најдоа сила да покажат одговорност и мудрост, а сега не гледаме таква подготвеност од страна на Вашингтон и неговите сателити“, рече Лавров.
На прашањето што треба да направи Русија сега во актуелната криза, Лавров рече: „Подготвеноста на Русија, вклучително и претседателот Владимир Путин, за преговори останува непроменета“.
Портпаролот на Советот за национална безбедност на Белата куќа одби да ги коментира изјавите на шефот на руската дипломатија, но укажа на претходните изјави за одржување на отворени линии за комуникација со Москва.