Пред неколку дена на YouTube беше споделен лажен трејлер за продолжение на филмскиот серијал за Џејмс Бонд, а создаден е со помош на вештачка интелигенција.
Фановите го сакаат Хенри Кавил во улогата на агентот 007, а Марго Роби како Бонд девојка.
Насловен „Bond 26“, трејлерот направен од фановите содржи „различни ефекти, дизајн на звук, технологии за вештачка интелигенција, филмска анализа и други елементи“ за да изгледа веродостојно. Во описот се наведува и дека видеото е создадено за забавни цели и не е засновано на некој тековен проект.
Сепак, се чини дека обожавателите на франшизата за тајниот агент беа воодушевени од идејата Хенри Кавил да ја има главната улога покрај Марго Роби, која е една од најпопуларните актерки на денешницата.
„Го сакаме него!“, „Хенри Кавил како 007 е сè што ни треба“, се дел од коментарите, а фановите напишале и дека актерот навистина треба да стане новиот Џејмс Бонд и дека популарноста на ова видео ќе ги убеди продуцентите да го сметаат за наследник на Даниел Крег.
Меѓу наведените причини зошто Кавил би завршил исклучителна работа како 007, обожавателите наведуваат дека актерот бил дел од многу акциони и адреналински филмови, вклучувајќи го Mission: Impossible – Fallout. Затоа, не би требало да му биде тешко да го игра Бонд.
Говорејќи во шоуто The Rich Eisen Show, Кавил претходно се осврна на желбите на обожавателите тој да биде следниот Бонд.
„Сè што знам се гласини. Ги имам истите информации што ги имате вие“, рече Кавил, додавајќи: „Можеби сум премногу стар сега или можеби не сум. Ќе видиме какви се плановите“.
Сепак, британските медиуми неодамна објавија дека продуцентите го избрале актерот Арон Тејлор-Џонсон за наследник на Даниел Крег.