Легендарната британска рок група „Лед Цепелин“, повторно ќе мора да оди на суд после одлуката на американскиот суд да биде одржано ново судење, поради плагијат на легендарната песна „Stairway to Heaven“ од 1971 година.
Апелациониот суд во Сан Франциско процени дека судењето од 2016 година било полно со процедурални грешки.
Судот во 2016 година ја разгледуваше тужбата поднесена против британскиот бенд, за кршење на авторски права, наведувајќи дека почетните ноти од славната песна не се дело на гитаристот Џими Пејџ, туку составен дел од песната „Taurus“ на калифорнискиот бенд „Спирит“ од шеесеттите години.
Тужбата не ја поднесе овој бенд од Калифорнија, туку нивните наследници.
Судот тогаш одлучи во корист на британскиот бенд.
Песната „Taurus“ во 1968 година ја издаде бендот „Спирит“, а авторот на таа песна, односно гитаристот на групата од Калифорнија, Ренди, и од порано во неколку наврати истакнуваше дека „Лед Цепелин“ неколку пати настапувале на исти места како и групата „Спирит“, како и тоа дека групата можела да ја слушне таа песна.
Песната „Taurus“ трае две минути и 37 секунди, а во хитот на „Лед Цепелин“ се слуша една минута од таа песна и тоа на самиот почеток.
„Тие момци заработија милиони долари, а не ни кажаа ниту благодарам“, рече гитаристот Ренди во 1997 година, кој потоа почина истата таа година.
Од друга страна, други музичари сметаат дека „Лед Цепелин“ плагирале уште три нивни познати песни и тоа „Babe I’m gonna leave you“, „Dazed and confused“ и „Lemon song“.
