Новите автомобили, посебно оние електричните, се опремени со технологија за полуавтоматско возење кое го ослободува возачот од голем дел од обврските зад воланот. Tesla е еден од оние производители чии автомобили имаат најнапреден систем за автопилот, па нивните возачи се опуштаат до степен на тотално заборавање на безбедноста во сообраќајот.
Во овој момент, ниту автомобилите на Tesla не поседуваат толкава автономија за да можат самите да се движат низ сообраќајниот тек без надзор на возачот, што значи дека личноста зад воланот треба да биде подготвена во секој момент да го преземе воланот доколку автомобилот не може да препознае некоја пречка.
Но, тоа не ги спречува возачите на Tesla да бидат неодговорни и да ги прекршуваат инструкциите кои многу јасно им се дадени од страна на компанијата. Последен таков случај беше забележан во Калифорнија, каде еден возач на Model 3 беше снимен како спие зад волан додека неговата Tesla „леташе“ по автопат со 105 км/ч.
Возачот кој го сними видеото тврди дека ја следел оваа Tesla на автопатот преку 50 километри и за сето тоа време возачот на автомобилот спиел на седиштето. Исто така, тврди дека на воланот видел нешто врзано, веројатно за да го спречи гасењето на автопилотот.
Случајот беше пријавен во полиција, а останува да видиме каква ќе биде разрешницата.