Денеска во Градскиот парк во Скопје се одржа завршниот народен собир на Левица каде што свои пригодни обраќања имаа носителите во изборните единици и претседателот на партијата, професорот по римско право Димитар Апасиев.
„AСНОМ е она што сега го возобнувуваме. Тие што нè ословуваа дека сме националисти, нека знаат дека повеќе Турци и Бошњаци ќе влезат преку листите на Левица, отколку преку нивните етнотрибалистички листи. Ако сакате војна, ќе добиете. Ама, ова ќе биде класна војна на сиромашните против олигарсите“, порача професорот и носител во ИЕ1.
Според Апасиев, Левица не е лажна опозиција и Левица има светла иднина.
„Оставете ги овие балони што се дуваат, овие максовци кои ќе испарат за година-година и пол. Ние на овие избори очекуваме да влеземе со пратеничка група, а нашиот народ знае дека треба да го даде гласот за Левица!“, порача Апасиев.
Својот говор, Апасиев го заокружи со благодарност до членовите и симпатизерите на Левица.
„Сакам да ви се заблагодарам најискрено и најчовечки, бидејќи вие сте денес тука - водени од идеали и од каузата што нè обединува. Никој од вас не зеде пари за да дојде тука на овој заеднички народен собир на Левица. Никој од вас не го вработивме преку Левица. Сега имаме набљудувачи во рекорден број. Како никогаш досега разваливте на терен! Веќе го надминавме епитетот на мала и Facebook-партија, затоа се плашат од нас. И има зошто да се плашат!“, додаде Апасиев.
