Откако не успеа да постигне ниту еден гол за Ница од почетокот на сезоната, Марио Балотели реши да ја промени средината и да потпише за лигашкиот ривал Олимпик Марсеј. Ова ќе биде негов седми клуб во кариерата.
Поранешниот напаѓач на Манчестер Сити и Милан потпиша шестмесечен договор со Олимпик Марсеј, кој ќе го задржи во клубот само до крајот на сезоната, пред раководството да одлучи дали сака да го задржи или не.
Марио Балотели (28) и челниците на Ница се договорија да го раскинат меѓусебниот договор, што значеше дека Италијанецот стана слободен играч и во истиот момент му се приклучи на тимот на Олимпик Марсеј, каде ќе се обиде да ја пронајде голгетерската форма. Во изминатите две сезони Балотели одигра 51 натпревар за Ница и постигна 33 гола, но оваа сезона не успеа да ја затресе противничката мрежа ниту еднаш.
„Тој нема тренирано, ниту играно фудбал цел месец. Поради тоа, тешко е да се каже дали може да биде подготвен за натпреварот во петок. Можеби ќе ни биде потребно повеќе време за да го направиме 100% подготвен за игра“, изјави тренерот на Марсеј, Руди Гарсија.
Во петок Олимпик Марсеј игра против моментално второпласираната екипа во француската Лига 1, Лил. Со поволен резултат, тимот на Руди Гарсија би се приклучил во трката за некое од местата кои водат во европските натпреварувања следната сезона.