Македонија денеска гласа на деветтите по ред парламентарни избори, четврти предвремени избори од 2008-та година па наваму. На изборите учествуваат шест политички партии и пет коалиции, со 58 листи и 1.092 кандидати. Гласањето на сите избирачки места започна во 7 часот, а ќе заврши во 19 часот со тоа што отворени се 3.480 избирачки места во шест изборни единици ширум земјава.
На изборите право на глас имаат 1.784.416 полнолетни државјани на Република Македонија, од кои 230.122 лица се издвоени во посебен извод од списокот. Во седмата изборна единица (дијаспората) гласањето се одржа вчера, а право на глас имаа 20.573 граѓани.
Изборите ќе ги набљудуваат 7.585 домашни и 667 странски набљудувачи со 354 преведувачи.