Пратеникот Владо Бучковски денеска одржа работна средба со Јавниот обвинител на Република Македонија Љупчо Шврговски, на која му презентирал документи за случајот „пензија или плата за министерот за правда Михајло Маневски“.
На средбата Бучковски понудил докази, како што потенцира, дека во првите четири месеци од оваа година министерот Маневски, спротивно на законот, земал и плата и пензија.
Тој изрази уверување дека Јавното обвинителство сериозно ќе пристапи кон разгледување на понудените документи, ќе бидат прибрани и дополнителни информации и во оваа постапка никој нема да биде над законот.
- Тврдам дека одговорноста е кај министерот Маневски затоа што станува збор не за остварување на некое право, каде институциите доцнат во постапката, туку се работи за ускратување на неговото право, изјави пратеникот Бучковски по средбата.
Изразувајќи жалење што, како што посочи, товарот на одговорноста бил префрлен на сите институции кои евентуално биле одговорни за направениот пропуст, Бучковски оцени дека оваа афера, како што ја нарече, пред се треба да заврши со политичка одговорност на министерот за правда Михајло Маневски.
Според Бучковски, министерот Маневски „самиот се наместил“ со дадената изјава дека дури на 23 февруари 2009 година ја започнал постапката за ускратување на неговото право, која била реализирана на 1 мај годинава.
