Во седум основни училишта во општина Аеродром од денеска почна бесплатна обука за компјутери и изучување на англискиот јазик.
Проектот го организира општината во соработка со основните училишта со цел да им се помогне на граѓаните во изучувањето на овие области. Обуките ќе траат три месеци, а наставата волонтерски ќе ја одржуваат наставниците по англиски јазик и информатика од училиштата.
Кусевите ќе ги посетуваат околу 700 жители на општината на возраст од 17 до 77 години. По завршувањето на обуката тие ќе полагаат завршен испит по што ќе добијат сертификат за стекнатите знаења.
Министерот за образование и наука Никола Тодоров смета дека станува збор за интересна идеја која ќе и овозможи на една широка популација да се образува во најважните сфери на живеењето.
- Во Република Македонија има недостаток од вакви кадри, така што знаењата што ќе ги стекнат, сигурен сум дека ќе им помогнат подобро да функционираат во животот и евентуално да најдат некоја подобра работа или подобро и поефикасно да ги извршуваат своите редовни обврски и задачи, рече Тодоров на означувањето на официјалниот почеток на обуките во основното училиште „Блаже Конески“.
Тодоров изрази надеж дека вакви слични проекти ќе бидат иницирани и од другите градоначалници во државата.
Градоначалникот на општина Аеродром Ивица Конески најави дека ќе продолжат со обуките и во иднина и изрази надеж дека по завршувањето на овие курсеви ќе се пријават уште поголем број на граѓани.
