Груба лага и манипулација на СДСМ е дека проектот чини двесте милиони евра, изјава денеска Александар Николоски, член на Извршен Комитет на ВМРО-ДПМНЕ.
- Проектот чини помалку или 0,5 отсто од буџетот имплементиран во осум буџетски години. Значи 80 милиони евра поделени во осум буџетски години, од кои добар дел се веќе инвестирани. Средствата се инвестирани претежно во згради, изградба на филхармонија, државен архив, Уставен суд на Република Македонија, министерство за надворешни работи, театар, музеј итн, рече Николоски.
Тој посочи дека од девет објекти, седум се веќе започнати, а останатите се хотели и јавни објекти во кои ќе инвестираат приватни инвеститори.
За најавата на потпретседателот на СДСМ и градоначалник на општина Струмица, Зоран Заев дека ќе вложи четири милиони евра за плоштадот во Центарот на Струмица, Николоски смета дека со тоа ќе се потрошат 40 отсто од реализираниот буџет на општината и ќе се доведе во прашање исплатата на плати за струмичката администрација.
