Полициската Единица за борба против трговија со луѓе и криумчарење мигранти, денеска реализира случај на криумчарење мигранти, при што е разбиена меѓународна оганизирана криминална група составена од македонски, српски, кинески и грчки државјани.
Во акцијата под псевдоним „Канис“, во координација со МВР на Србија и СЕКИ центарот во Букурешт, разбиена е криминалната група, која подолг временски период вршела криумчарење на мигранти по потекло од Кина, кои преку Србија, Македонија и Грција заминувале во западно европските земји.
Портпаролот на МВР, Иво Котевски денеска на прес - конференција соопшти дека од слобода се лишени 24 членови на криминалната група, од кои во Македонија во текот на денешниот ден се приведени вкупно 12 лица, од Скопје, Куманово и Гевгелија. Меѓу нив е и еден полициски службеник.
Од слобода се лишени 12 членови на групата и тоа Ј.Ј.(37) од Богданци Гевгелија, Н.Р.(28) село Селемли-Богданци Гевгелија, И.М.(34), М.М.(27) од село Алгуња Куманово, Г.В.(32) од Скопје, Д.Д.(25) од Скопје, Г.М.(38) од Куманово, М.К.(41) од Куманово, З.Д.(37) од село Богородица Гевгелија, В.Д.(29) од село Стојаково Гевгелија, С.В.(30) од Куманово и С.В.(27) од село Четирце Куманово. Организатори на криумчарењето на мигрантите во земјава биле Горан Велков, припадник на ЕБР од Скопје и Јане Јовановски од Богданци.
Сите се приведени во полициската станица „Гази Баба“ и заедно со кривичната пријава ќе бидат предадени на надлежен истражен судија.
Против нив денеска до Основното јавно обвинителство за гонење на организиран криминал и корупција, ќе биде поднесена кривична пријава за сторени кривични дела „криумчарење на мигранти” и „организирање на група и поттикнување на извршување на делата трговија со луѓе и криумчарење мигранти”.
- Во периодот од ноември 2008 до мај 2009 година документирани се 11 „транспорти на мигранти”, со кои преку овој „канал“ се прокриумчарени вкупно 35 кинески државјани, рече Котевски.
Котевски појасни дека според досегашните сознанија кинеските мигранти по воздушен пат пристигнувале во Белград, од каде со возила биле превезувани до српско-македонската граница, и на илегални премини во близина на Куманово, биле префрлани на македонска територија, каде биле прифаќани од членови на групата-македонски државјани. Мигрантите со возила биле пренесувани до македонско – грчката граница, и на илегален премин во близина на Гевгелија, влегувале во Грција од каде заминувале во некоја од западноевропските земји.
Портпаролот на МВР информира дека се извршени претреси во домовите на сите лица лишени од слобода.
- При извршен претрес во домот на три од приведените лица, кои не се припадници на македонското МВР, пронајдени и одземени се полициско рото светло, службена легитимација на припадник на МВР без фотографија, така наречена фантомска црна маска, еден пиштол марка „Бровинг патент„ калибар 9 милиметри, еден гасен пиштол марка „Екол„ со 10 патрони, регистарски таблици од возила и други предмети кои биле користени при транспорт на мигрантите со цел да бидат избегнати полициските контроли, нагласи Котевски. Одземени се и седум автомобили за кои постои сомнение дека биле користени при транспортот на мигрантите.
