Уставниот суд на Република Македонија на денешната седница укина одредби од Законот за средно образование и Законот за основно образование кои се однесуваат на екстерно проверување на успехот на учениците.
Судот одлучи да ги укине одредбите од овие два закони во делот со кој се предвидува екстерно проверување на знаењето на учениците да го организира и спроведува Министерството за образование и наука и Државниот просветен инспекторат. Укинувањето е затоа што Судот оцени дека образованието е интерес и потреба на општеството во целина додека стекнувањето на образованието се следи континуирано при што континуитетот на стекнување на знаењето е делокруг на наставниците со оглед дека тие се директно инволвирани во воспитно-образовниот процес во текот на целата учебна година, поради што проверката на знаењето на учениците според Уставот е во надлежност на образовните установи, па поради екстерната проверка не можат да ја вршат органи на извршната власт (МОН и Државниот просветен инспекторат).
Судот смета дека со овие две одредби од Законот се повредува поделбата на власта на законодавна, извршна и судска, како и владеењето на правото.
Од Судот велат дека екстерно проверување на знаењето на учениците може да има, но тоа мора да се спроведува од образовни установи.
