Уставниот суд на денешната седница поведе постапка за член 4, точка 30 и за член 6, ставови 8 и 9 од Царинскиот законик, внесени со измените од 2008 година, бидејќи оцени дека се недоволно прецизни, нејасни и оти е можно различно нивно разбирање, а со тоа и субјективно применување, што не е во функција на владеење на правото.
Непрецизноста во овие законски одредби Судот ја гледа бидејќи во нив е наведено дека постои „лице со поголем ризик“ во врска со царинската постапка, кое во последните 12 месеци има некакв долг (царински, по основ на данок на додадена вредност или на акциза) во висина од 10.000 евра.
За Судот се поставува прашање за кои последни 12 месеци станува збор, дали пред почеток на царинска постапка и дали тој што ја започнува царинската постапка со оглед дека не е во правилото на Законот дефиниран моментот може субјективно да определи -од сега па наназад 12 месеци, доколку е сторено нешто и ќе биде третиран како лице со посебен ризик.
Втор пример за непрецизноста е определувањето на вредноста од 10.000 евра да биде граница за определен субјект да се смета за „лице со поголем ризик“ во царинската постапка. Имајќи предвид дека различни субјекти од аспект на број и профитабилност учествуваат во застапувањето на царинската постапка, од една страна се оние со неколку стотини вработени, а од друга страна се тие со еден или двајца вработени, според Судот се поставува прашањето дали определувањето на износ од 10.000 евра е соодветна мерка за едно лице да се смета за „лице од поголем ризик“ во царинската постапка, бидејќи за едни тие 10.000 евра се безначајна сума, а за други астрономска сума.
Дилемите за непрецизноста во овие одредби за Судот се во однос на тоа дали „лице со поголем ризик“ се смета лице за кое е утврдено дека во последните 12 месеци придонело да настане царински долг, долг за ДДВ или долг за неплатена акциза.
Раправата по одредби од Царинскиот законик требаше да се одржи минатата седница, но беше одложена за седум дена, затоа што, пред почетокот на седницата до Уставниот суд беа доставени поднесоци од иницијаторите - Групацијата на меѓународни шпедитери и логистички оператори при Стопанската комора на Македонија и од Министерството за финансии.
Во поднесоците се изнесуваат видувања на иницијаторите и на Министерството за финаснии во врска со уставноста на оспорените одредби од Царинскиот законик, односно е наведено како тие ги разбираат одредбите од Царинскиот закон во однос на уставните определби. Одложувањето на расправата е затоа што писмените поднесоци не беа содржани во работниот материјал изготвен од референтите по предметот, бидејќи ги примиле пред почетокот на седницата и немале можност да ги обработат.
